本文重點
有人曾經同絲絲講過：「人肥先至好，因為有更多面積畀人去錫你。」寶來證券外匯分析師陳健豪（Aaron）係一個好例子，佢由小學二年級開始暴肥，致肥原因係屋企人過分寵愛。「嗰時姑姐每朝早都會嚟屋企幫我溫習功課，仲會買一個漢堡包畀我食；到中午時，因為我鍾意食撈麵，嫲嫲又會整兩個畀我。」
初投匯海輸一半
睇番Aaron張肥仔相，都肥得幾可愛吖！佢就話：「張相影到我連兩隻手都伸唔直，就知我肥得幾勁啦。」好彩由細到大都有運動嘅Aaron到小六時開始變瘦。由於Aaron現時工作太忙，有時夜晚十點先收工，返到屋企都會繼續睇住匯市，依家運動以跑步居多。
其實金融界嘅範疇咁大，點解Aaron會對外匯工作有興趣呢？原來係因為佢覺得外匯市場夠大，交易透明度高又比較公平，唔會有股票市場受大戶影響嘅問題出現，賺唔賺到錢完全靠個人嘅眼光及能力。不過Aaron都試過投資失敗，「當年剛做外匯，自己用咗十萬元投資，最後輸咗一半。」呢次經驗令佢更明白投資要定止蝕位嘅道理。
余絲韻