本文重點
絲絲向來對靚女嘅消息特別留意，尋日見到香港體檢（00397）發咗個公告，話「玩具大王」蔡志明幼女蔡加怡（Crystal）以及曹貴子同樣因需要更專注處理其他個人業務，辭任公司執行董事職務。
冀專注康健業務
絲絲仲以為Crystal趁呢排地產市場暢旺，要專心幫父親大人處理地產生意，於是馬上打電話畀曹醫生（曹貴子）問個究竟。
曹醫生叫絲絲唔好亂諗，佢話之前佢同Crystal入去體檢幫手，主要因為康健國際（03886）係體檢嘅大股東，兩人代表康健入去體檢董事局，但隨着康健喺體檢嘅角色慢慢淡化，佢同Crystal就想專注番康健嘅工作，所以先辭去體檢嘅職務。
講起體檢，都算同Crystal有啲情意結，事緣Crystal當年加入康健後第一個任務，就係收購「殼股」公司星虹控股，當時康健以6,000萬元認購咗星虹一批可換股票據，以取得星虹嘅控股權，其後注入體檢業務，公司就改名為香港體檢。
余絲韻