本文重點
證監會近期頻頻報捷，繼法規執行部董事施衛民因捉咗多條「大魚」而聲名大噪後，證監會又有高層取得國際銜頭，真係可喜可賀！掌管中介團體監察科嘅高級總監浦偉光日前獲選為國際證監會組織（IOSCO）旗下監管市場中介人士委員會嘅主席。
任IOSCO旗下監委主席
呢個委員會主要負責檢討有關跨境規管及監督市場中介人嘅標準，並會就監管準則提出建議，目前委員會嘅成員有來自歐洲、美國及亞洲嘅16個監管機構，香港嘅代表能夠從16個監管機構中，脫穎而出當選主席，都算為港爭光！
其實浦偉光多年來一直就中介人監管參與制訂及落實監管措施嘅工作，經驗豐富。絲絲就成日聽啲經紀呻，話證監會監察中介人活動只有嚴沒有鬆，事實上喺金融海嘯下，本地華資經紀就真係未有一家「出事」，同證監會一早就雷厲風行，收緊中介人嘅孖展借貸轉按上限有一定關係。
除咗浦偉光外，證監會行政總裁韋奕禮依家亦係國際證監會組織技術委員會沽空專責小組主席，領導全球就沽空制度作出改革。
余絲韻