本文重點
新地（00016）尋日出咗截至今年六月底止年度年報，絲絲第一時間睇吓各高層人工有冇增減，結果不出所料，喺金融海嘯下，兩位副主席郭炳江及郭炳聯都減咗人工，其中二哥郭炳江總薪酬由210萬減至206萬元，細佬郭炳聯總薪酬就由227萬減至223萬元。
兩大老臣子逆市加薪
兩位郭生總薪酬減幅輕微，比起唔少打工仔都幸運，不過大佬郭炳湘相對上就「減得多」，因為佢喺去年五月由新地主席兼行政總裁調任非執董，○九年度總薪酬由對上一年嘅284萬大減至13萬元。
郭氏三兄弟去年都減咗人工，不過老臣子陳鉅源及鄺準就有人工加。同樣都係執行董事，陳鉅源○九年度總薪酬突破一千萬大關，有成1,025萬元，係董事局入面最高薪嘅一位，佢對上一年總薪酬係933萬元。鄺準總薪酬亦有些微調升，由之前一年嘅392萬微升至396萬元。金融海嘯下逆市加薪，新地對老臣子可算不薄喇。
余絲韻