大市升穿二萬二後暫無力再上，不過股仔就愈炒愈醒神，如果計番個價，唔少股仔現價只係處於五、六月時嘅起步價，有咁大炒上空間，難怪近期開始蠢蠢欲動。古晨經常講，炒股係炒時勢，現時外圍大好，啲股仔又跌過一浸，正係易升難跌之局，只要市場氣氛好番，隨時再有第二春。
內地剛剛公布咗第三季經濟數據，隨着4萬億元工程開展，固定資產投資增長率達到33%，認真犀利，計落啲基建股隨時會炒番轉，當中古晨就睇中隻中國南車（01766）。內地近期大搞高速鐵路網，正正開正佢強項，雖然其股價近期好鬼牛皮，其實係營造緊三角形，尋日見都行到非常尾聲，而且成交縮晒，正正係準備突破之勢，現價買入風險唔大，但一旦突破隨時可見6元，止蝕位不妨考慮4.2元。
古晨