祖國魚缸早段下跌，但跌勢尚算溫和，在下較關注今日祖國魚缸創業板進行剪綵，廿八件新丁將於下周五齊齊登場，未知對A股帶來乜嘢影響。隔晚花旗魚缸繼續抖氣，道指再失萬點關，兩個利淡因素令本地魚缸低開，恒指在上半場，最多跌逾300點。

下半場祖國魚缸跌幅收窄，恒指亦收復部分失地，散場報收22,210點，跌107點或0.4%；國企指數則失守萬三，報收12,959點，跌41點或0.3%。現貨場成交額699億元，都係近日平均數，隨着期貨場結算日逼近，在轉倉活動增加下，期貨場成交料顯著上升。

淡友似已無力反擊

短期唔見得有老利消息可刺激魚缸再攀高峰，但在資金持續流入下，古勝都係搵唔到藉口魚缸要屠殺，淡友在十月份可以話輸得一敗塗地，能否轉戰十一月，古勝烏卜卜。不過，在下認為淡友經過連續兩季被殺至體無完膚，已無乜本錢再反擊，大戶又搵唔到對手轉身，暫無必要改變大好友立場。

港交所有條件再上

八卦公話缸邊友冇乜邊個有貨在手，愈升愈唔敢追，大戶當然無對手派貨，既然貨源歸邊仍在大戶手，睇在年尾份花紅分上，實無必要向魚缸開刀，踩冧魚缸無着數，本地魚缸或留守在高位至年底，明年首季再定新策略。難怪幾間大行唱好，恒指目標一再調高，二萬三算睇得保守，樂觀睇好，話恒指要高見二萬六七亦大有人在。

藍色大隻佬乏善可陳，大部分腳軟下跌，利豐（00494）跑第尾，跌幅超過3.5%。富士康（02038）則跑第一，升6.8%，高收7.35元，QQ（00700）亦愈升愈有，再創148.8元新高，報收147.4元，升逾4%。日前有吹水報告唱好港交所（00388），其目標價更被大幅調高至200元，近日股價表現極為硬淨，昨日逆市靠穩，走勢隨時突破，有條件挑戰年內高位。

祖國料能順利「保八」，經濟數據理想，九月份社會消品零售總額達10,913億元，按年增長15.5%，亦較八月份升0.1%，反映北大人谷內需漸見成效。作為華南及西南富庶地區的百貨連鎖店龍頭，茂業國際（00848）料可受惠於內需增加。

藉收購擴百貨版圖

茂業今年的中期純利跌19%至2.44億元（人仔‧下同），營業額升9%至21.34億元，經營利潤跌13.7%至3.59億元，主要因為新開店尚處於市場培育期，盈利貢獻有限，而相關的營運費用卻相應增加。不過，茂業一直擴大其版圖，除可增加市佔率外，亦可帶來規模效益，料集團會繼續尋求百貨門店及百貨公司的收購機會，預期於未來三年，每年新增門店樓面面積不少於10萬平方米，可望在祖國百貨業中，進佔二哥地位，晒士僅次於百盛（03368）。茂業另一吸引之處，是其物業價值折讓超過三成，以及投資A股的最近市價均未在其股價上反映，股價上升潛力大。

古勝