喺聯繫匯率下，只要美元繼續弱，加上市場估港元終有一日「改掛」人民幣，就不斷會有內地及海外資金嚟香港炒樓、炒股。睇番本港地產股今年都升咗好多，其中恒地（00012）今年就累積升咗86%。

中產想置業，除咗慳錢仲要錢搵錢，香港投資門路雖然多，但始終難保係咪一定跑贏樓市，最直接當然係炒樓，但有大筆錢炒樓就唔會上唔到車。最理想係搵一樣保證追貼樓市升跌，又可以小本入場嘅投資產品，例如投資「樓價掛鈎票據」，派息按樓市表現決定；或者買「樓價ETF」，基金價格跟住樓價走；又或者係「樓價簿仔」，玩法如同銀行嘅黃金戶口。

投資有賺自然上到車

可惜以上產品只係我想像出嚟，希望香港早日有呢種「樓市衍生投資產品」出現，到時唔怕樓市被炒高，你炒得愈高，我投資喺「樓市衍生投資產品」回報跟住升，或多或少解決到「上車」問題。

當然要發展呢樣產品唔易，一個具代表性嘅樓價指數係第一步，代表性唔只係多人睇，仲要能夠讓發行商搵出一個投資組合有效模仿指數嘅表現。其實澳洲早就有「樓價窩輪」，所以我唔算天馬行空。

諗諗吓，不如將呢條橋Sell畀老闆。仕途要緊，唔好忽略升職加薪，都係盡快追上樓價升幅嘅好方法。

（大健）