「V」同「W」係用來描述宏觀經濟形態，套用股市當中，又唔知得唔得呢？有「港版末日博士」之稱嘅交通銀行首席經濟及策略師羅家聰（K.C）就直接話，呢個講法行唔通。

羅家聰：剔形似啲喎

今次事出突然，搵K.C「解韱」，佢第二日仲要去台灣旅行，但當我以為訪問做唔成，K.C好大方話唔介意我去佢屋企直接傾。哈哈，去「末日博士」屋企做訪問，感覺都幾得意。

高妹：最近紀勤話世界經濟會呈「W」形，可能跌多一鋪，你有乜睇法？

K.C：經濟形態一向都係呈「V」形上落。單睇圖嚟講，我就見唔到有「W」，只係見到有兩個V，有時候唔止一個底，可能係幾個底，即係我所講嘅「多底衰退」。如果從整體經濟趨勢嚟講，都有可能形成一個L形或者U形；至於經濟周期上落，我個人認為全世界都無出現過U形，如果你搵到，你話番我知。

高妹：好多人話股市「V」形反彈，其實股市有無「V」形甚至「W」形？

K.C：股市有上有落，頂係尖，底都係尖。假設港股走勢由一個頂位下跌，然後再升上另一個頂位，中間會形成一個如你所講嘅「V」形；市況好時，港股走勢會不斷向上升，但我唔會形容呢個走勢叫做「V」，因為股市走勢唔會好似「V」形咁對稱，所以最多只可以話係一個「剔」。而且，「V」形係用嚟形容宏觀經濟，我唔會評價其他人點講，但我唔會套用落股市度。

散戶睇23000即沽貨

聽完K.C嘅分析，我去咗致富證券旺角分行搵股友傾傾，明查暗訪睇吓佢哋到底明唔明乜嘢叫「V」同「W」。股友劉生話：「股市有『V』或『W』幾出奇？跌落嚟然後急速反彈咪叫『V』形囉，有貨揸住就開心；『W』形？人人都話唔會，如果掉轉頭下跌，我就即刻止蝕。」

至於股友余生就話︰「經濟會見『雙底』，港股好快會回落見『W』形格局。上個禮拜升咁多，擺明係大戶引散戶接棒。我估後市會升上23,000至24,000點，到時候我會沽貨，等恒指跌到20,000點樓下再買貨。」

聽完兩位股友嘅意見，先發現大家都慣咗用「V」形去睇股市。「鈴鈴鈴……」原來有「波浪大師」之稱嘅銀聯信託投資總監林一鳴打畀我，等我又問吓佢關於「V」形嘅問題先。佢就話：「我會將波浪理論套用於股市走勢，即『五浪上升、三浪下跌』嘅基本節奏，除非遇上長期大熊市，才有可能出現L形走勢，相反V形走勢就較難出現。」

36%股友料接踵加息

講番近期港股，明顯呈現出一副「少女心事」嘅樣子，微笑間又似有心事，始終無法急漲令人開懷大笑。今期《東方產經》網上民調問吓股友，澳洲喺金融海嘯後率先加息，四大經濟體（美國、歐元區、中國及日本）又會跟隨加息嗎？截至上周末晚上6時，有12%股友估一個月內加息，6%人估兩個月內加息，18%人就估會3個月內加息，不過就有64%人覺得今年內都唔會加息。

當我為市況憂心之際，門外傳來莉莉嘅歌聲：「Sayonara，Sayonara，少女心事，但願我亦了解我也能知。」唱得咁開心，我估到佢一定係去咗唱K，激死我啦！莉莉就話：「我無偷懶呀，只係約咗個朋友出去八吓料，原來今日『輪后』瑞銀李靄欣專程到英皇證券旺角分行講Talk，佢會即場教炒牛熊證技巧。」

高妹