自由經濟學派，常有批評政府唔應該對經濟施以無形之手，救市解了燃眉之急，避免去年信貸市場徹底崩潰，不過，注資只係將問題押後浮現，各國政府唔可能在天文數字財赤下，繼續無限量印發鈔票，出現今日救市容易，退市難的困局。本周港股跌幅已經算溫和，累積跌599點報21,024點，多得新股孖展回流，港元短期拆息仲係相當低，三個月及半年分別唔夠0.2厘及0.5厘，一葉知秋，退市憂慮似乎仲係局限於股市層面，筆者只係擔心，狼來了故事講多幾次，會愈來愈多人信以為真。

中冶（01618）之後，又一隻新股首日破底，西裝股利郎（01234）報收3.87元，較招股價3.9元微跌0.77%，相信新股熱短期都要停一停，抖一抖！

基金公司惠理（00806），八月底管理資產總值44億美元，比七月底減少4.35%，同八月份恒指跌幅4.1%相若；今年股市勁升，可惜唔少基金公司唔係太過受惠，由於唔少基金以最高位計算bonus，簡言之，係一日基金單位價格唔升穿上次高位，一日無表現獎金，單係依靠每年收取平均1%管理費（照計就係4,400萬美元或3.43億港元）同認購贖回等有限收入，未有耐可以重見○六、○七兩年大牛市，累積勁賺超過22億元的光輝。

新世界（00017）旗下新世界百貨（00825），筆者對在港分店印象一般，公司顯然也志不在此，數百萬人彈丸之地，又點及13億人口市場，目前新百貨在內地擁有多達33間分店，最近斥資億元作全面翻新，管理層也積極與傳媒及芬佬會面，似乎有不再低調之勢。

現金約佔市值三成

論估值，新百貨比百盛（03368）、金鷹（03308）都平，新百貨預期市盈率21.6倍，後者分別29.2倍及32.7倍，假如改形象可以拉動估值睇齊，潛力唔可以睇小，而且新百貨手上現金近31億元，差不多是市值三成，即使減去貿易貨款，都有近20億元，財政上是安全得很，股價連續兩日大成交向上，宣傳工夫做足有火燒冷灶的情況，下星期不妨留意。

戴峰修