本文重點
久未露面嘅遠東金源（01188）主席仰融一向做慣汽車生意，佢又有新搞作，喺美國宣布生產「香港車」，呢款車同真正嘅港產汽車唔同，仰融話美國造車項目全名叫Hybrid Kinetic Motors，所以英文簡稱就係HK汽車，係多燃料混合嘅動力車，標榜燃燒率高及零污染。
祖國項目選址落戶
仰融喺美國嘅造車項目會落戶於阿拉巴馬州，工廠將於二○一二年完成建設，到二○一四年嘅產能將達到三十萬架，創造近六千個直接職位。
被問到幾時返中國造車，仰融冇特別回應。有消息話佢嘅中國項目已有突破，將落戶三地，但就唔包括最初傾向嘅遼寧鐵嶺。不過，仰融強調選址要有良好汽車產業基礎，業界猜測，遼寧和吉林兩省嘅可能性較大，始終遼寧係仰融起家嘅地方，多年來華晨汽車已令當地頗具汽車產業基礎，而吉林長春就更加唔使多講。
余絲韻