本文重點
因「股神」巴菲特之名而股價急升嘅內地服裝企業大楊，原來仲為股神提供免費服裝！股神話自己出過聲，但至今未收到大楊嘅服裝帳單，其實股神使乜畀錢，實情應該係大楊畀番錢股神做廣告費就啱數。股神話鍾意大楊西裝因為唔易皺，就算日日着，人哋都以為係啱啱洗好。
大楊本月十日喺網站貼出巴菲特恭賀公司成立30周年嘅片段，片內股神大讚大楊創辦人李桂蓮及其「創世」西裝。片段出街後，大連大楊創世嘅股價累計升逾70%。
被讚着得好睇勁冧
從未被稱為時尚達人嘅巴菲特話，「創世」西裝改變咗自己形象，仲話「創世」西裝好舒適，人哋說佢着得好睇，又話活到78歲先有人讚自己外表，佢已經將以前嘅意大利名牌舊西裝捐畀慈善機構。
股神話至今未收到大楊所開嘅帳單，雖然按照中國標準衡量，「創世」衣服很貴，最平都要約6,000蚊人仔，用上等羊絨製作嘅貴價西服就要2萬蚊人仔，訂造西服更要4萬蚊人仔，但喺股神眼中只是小數目，如果你搵股神賣廣告，又點止呢個價錢？
余絲韻