本文重點
渣打集團（02888）唔止搞銀行業務有火，搞運動亦相當落力，嚟緊仲做埋英超勁旅「紅軍」利物浦嘅贊助商。不過渣打行政總裁冼博德並唔係利物浦球迷，而係阿仙奴嘅死硬派「粉絲」，咁第時兩隊對決，佢心情咪好矛盾？利物浦同阿仙奴遲早會喺英超球場對壘，冼博德到時會支持邊隊？佢好認真咁答「This is a deep secret（這是個大秘密）！」然後就哈哈幾聲，揚長而去。
冼博德話，今次贊助可令渣打品牌認知度開創新領域，亦為業務增長提供額外催化劑。做得利物浦贊助商，當然想佢贏完一場又一場，不過阿仙奴又係冼博德最愛球隊，兩隊對決都唔知為邊隊吶喊助威好。絲絲都明白佢嗰種手掌係肉、手背都係肉嘅痛苦。
4年贊助費估逾10.3億
九二年開始，利物浦贊助商都係嘉士伯，一做就做咗十幾年，雖然冼博德唔肯透露今次贊助費用總共係幾多，不過外界估計可能要成1.33億美元（約10.37億港元）！今次渣打同利物浦簽咗4年合約，由下年七月至二○一三、一四年季度，渣打個名同標誌到時都會出現喺「紅軍」球衣上。利物浦主場時通常會着紅色衫，渣打個標誌就藍藍綠綠咁，撞埋一齊都幾醒神！
余絲韻