陳健豪限炒槓桿降風險

去年金融海嘯，陳健豪（Aaron）賺得最多的是澳元，「在市況波動下，只要減少注碼便可降低風險，現在短線仍持澳元好倉。」他個人投資不差，不夠運氣的是失去一份工作，「事實上，○八年係舊公司（CMC）賺錢最多嘅一年，公司為了集中海外生意，便結束本港業務，幸好我很快就找到現在這份工作。」

去年很多華爾街大行瀕臨「爆煲」，請求華府出手相救，Aaron深深不忿的是所有東西「炒得太大」，「外國嘅外匯投資槓桿比例200倍，香港則規定20倍，我就較穩陣，限制自己炒5至10倍槓桿，金融海嘯過後，美國設立條例收緊槓桿在100倍內，都算是一件好事。」

短線無妨 長線無謂

「經濟尚未復甦、失業率高企、企業盈利欠佳，過去兩季經濟數字只反映政府泵水刺激經濟情況，真正經濟表現要喺第四季和明年首季才見真章，估計有關數據並不樂觀。經濟面未足夠支持股市向上，依家高追值博率不高，長線投資風險亦較高；而捕捉短線升浪可能有斬獲，所以『短線無妨，長線無謂』。我現在揸得最多是現金，待回吐不少先考慮買入。」

Aaron之RAP歌

07年股市狂熱

到08一開始就係咁跌

個個嘅資產 唔使問 都唔見咗一截

金、股、樓、匯都係咁蝕

2009 睇嚟都仍然幾杰

轉眼間 又轉炒復甦

呢個講法會唔會太早

愈睇愈唔對路

失業率又愈創愈高

照咁睇 經濟又點會好

反彈到呢度

高追似不合時宜

遲咗會怨入得太遲

呢種感覺 係咪同07年有啲似

藺常念套股換樓執身彩

自稱「名牌財經演員」的藺常念（藺Sir）形容自己好好彩，金融海嘯來臨前及時「套股換樓」，之後一直忍手無入貨，直到滙控（00005）低見33元，才再度出擊。「股市有周期，跌完就會升，一啲都唔意外，股市將隨着經濟增長繼續攀升，現時恒指市盈率並唔算高，有信心今年恒指見23,000點，明年上望3萬點。短期升上22,000點應會回吐，估計每跌1,000點後再拾級而上。」

斥投行「賓卡」最無良

去年金融海嘯，藺Sir損手雖不嚴重，但都一肚子氣，「『海嘯』最令人睇唔過眼係投行Banker嘅道德敗壞，將納稅人嘅血汗錢輸掉，花紅就拎到足，浪費政府救市資金，實在係無良嘅行為，最離譜係貸款證券化，調高抵押債券嘅評級，將垃圾賣畀人嚟害人。」

藺Sir作品

晴天霹靂 雷曼執笠

股市插水 股民當災

財富消失 欲哭無淚

試問蒼天 公理何在

銀行大班 億萬花紅

盲目賭博 銀行輸去

衍生工具 罪魁禍首

百年老店 一朝沉船

獅子銀行 次按累死

三月九日 跌到七彩

神話消滅 股民感嘆

從此以後 不再捧場

小生一早收成險變苦主

小生屬於穩健派，持有最多的股票是港燈（00006），並只分配組合內小量資金作短炒，雖然未能受惠於恒指升浪，但勝在收息及不需時刻「實」大市。○七年恒指高峰期時，他毅然沽清手上的股票，欲存錢入銀行做定期，更險些變成雷曼苦主，「『海嘯』令我最嬲嘅事件，係見到雷曼苦主被人責罵『輸打贏要』，佢哋一定唔係貪心，因為所謂嘅定期息率一啲都唔高，任何一隻股票掛鈎嘅產品都可提供4至5厘息率。」

不再長揸 分段沽貨

過去一年，小生未有太大虧損，他指金融海嘯始終是一件好事，因為給予掃平貨的機會。至於後市如何部署，小生說︰「大市由谷底升番上嚟，自己都早咗收割，但斷估唔會癲到再衝上3萬點，嚟緊呢年應該打橫行居多。依家投資以保本為主，主攻高息股和外幣，另外亦會考慮抽新股，因為唔會有『蟹貨』，成本唔算高。近期策略就有啲改變，不再長線持有，明白『識得落袋先係回報』，故會分段沽出獲取最大回報。」

《海嘯年後》 改編自《七百年後》

美國這空倉 全美發出黑色的光

次按爆驚慌 而雷曼太令你失望

一天天奢侈生活極夢幻化

AIG當中一切帳目猶如垃圾缸

只好怪行事太骯髒

昂然行過去 全球泵水 凡事依足根據

熱情重現投入大市裏 有信心必定追

唯求能見你 甜甜入睡

叫任總 卸任拋低憂慮

衰退潮 裁員裡 也都過去

仍然信，這（悲歌/一波）終過去

寶來證券外匯 分析師 陳健豪

背景：01年開始寫網誌，去年起寫RAP歌記載生活點滴，偶像是歌手歐陽靖及組合農夫。

投資賺蝕：股票佔組合比重較小，去年股樓下跌影響不大，只是來自新股的利潤減少及遺留小量「蟹貨」。

富昌證券總經理 藺常念

背景：大學時主修英國文學，曾在雜誌發表英文詩詞。

投資賺蝕：去年初套現大部分股票賺了200萬元，連同其他本金轉為買樓，物業現已升值500萬元，剩餘的股票去年逐一沽出，只蝕很少。

股友 小生

背景：正職IT人，閒時翻唱流行曲，2、3年前開始在網上改編歌詞，累積作品在20首以內，較大回響是《酷跌》一曲，認為大市愈差愈有機會，近期所寫大多是正面的打氣歌，希望振奮人心。

投資賺蝕：金融海嘯下虧蝕3%至4%，今年已賺回不錯回報。