美股連升幾日之後終於斷纜，本地ADR已經唔精神，日本魚缸尋日亦唔爭氣，雖然上證重上3,000點樓上打氣，但本地魚缸仍低開逾300點，其後跌幅曾收窄一半，不過收市仍跌229點，最慘成交縮到得508億銀，班股民留番啲錢抽新股好過。

新股選擇花多眼亂

今日中午國藥（01099）就截飛（好多證券行尋日4點已截），明日輪到中冶（01618），後日到利郎（01234），下個禮拜更有7股齊招，兩隻內房新股恒盛（00845）同恒大同集資超過100億銀，兩個名差唔多，股民好容易搞亂。恒大前兩次想上市都撞正魚缸暴跌致功敗垂成，古勝都希望佢今次順風順水啦！

國藥、中冶同利郎邊隻可以跑出好難講，論招股反應就肯定係國藥贏，但在下睇國藥實在好貴，通常做分銷商（即中間人）只係值10倍PE唔到，大昌行（01828）炒到新高亦不過十幾倍，但國藥招股連埋首日升值計埋會係30倍PE過外。雖然賣藥錢途會好啲，但新嘅基本藥物名冊對呢類股是禍是福都係未知數。

炒新股唔使講質素，好似隻中國生命（08296）升到似火箭，肯委身於創業板上市無非係唔想派貨出街益散戶，到一段時間之後又轉返去主板玩。

賺錢能力猶勝李寧

體育用品股上完一隻又一隻，雖然上一隻361度（01361）損手爛腳，但跟住又有隻匹克來勢洶洶，睇番住幾隻影子股係時候。

講龍頭大哥，李寧（02331）喺國產品牌銷量號稱第一，但計賺錢則安踏體育（02020）勝一籌，安踏上半年6,000間舖賺6億元（人仔‧下同），明年首季定單增18%；李寧上半年7,000間舖賺4.73億元，明年首季定單額增11.6%。單睇以上數據來睇，買股並不一定要買龍頭。

安踏舊年奧運畀「前體操王子」喺開幕禮搶盡風頭，故今年不惜用重金爭番個國家隊贊助權，由於冇披露贊助金額，是否物有所值不能妄論，但肯定可幫到品牌嘅知名度。依家內地體育用品市場好怪，全世界都以adidas同nike馬首是瞻，不過內地人就對國產貨忠心度好高。安踏所賣產品較平，但透過贊助國家隊可提升層次，毛利率過去一年已升到40%以上。

古勝