本文重點
唔少人鍾意將樣子生得標致，文章又寫得好嘅女性稱為「美女作家」，相信i-banker妍宇絕對合條件。未夠30歲已有10年投資銀行工作經驗嘅佢，現職美資投資銀行資本市場部副總裁，早前推出咗第一本著作《華爾街的孩子》。
小時候好自閉
喺投行工作，每日都要接見唔同行業嘅人，相信妍宇嘅人際技巧一定好了得，但佢竟然話自己小時候十分自閉，亦好怕醜，所以當時父母就不斷叫佢參加校內活動及各類型比賽，希望個女可認識更多朋友。妍宇笑笑口話，當中最難忘係參加咗一個鬥快查英文字典嘅比賽，3位得獎者所得嘅禮物，係可親身坐飛機去牛津大學與出呢本字典嘅編輯見面。會考攞到九優，讀書醒目嘅妍宇，當然係其中一位勝出者啦。
依家妍宇與丈夫Chris同樣從事金融行業，兩口子都忙得不可開交，難得放假，佢哋就鍾意留喺屋企，安靜地閱讀及寫作。問到妍宇，佢呢個筆名係點得嚟？佢就甜絲絲咁話：「丈夫平時都有寫文章，佢嘅筆名叫宇言，咁我就叫妍宇，而『宇』字亦係丈夫真名中嘅其中一個字。」果然是一對令人羨慕嘅恩愛夫妻。
余絲韻