本文重點
平保（02318）最近推出號稱亞洲第一個網上帳戶管理工具「一帳通」，為咗凸顯呢個平台嘅神奇性，佢哋搵咗個新嘅代言人，佢就係風靡全國嘅「魔術王子」劉謙。受傷嘅「欄王」劉翔終於可休息吓喇！
講起搵代言人，內地企業好迷信金牌運動員嘅魅力，無論係國家跳水隊或籃球隊，只要係賽場上嘅常勝軍，廣告合約就好似雪片咁飛埋嚟。好似國壽（02628）搵籃球國寶姚明，平保就做劉翔嘅贊助商。
魔術王子絕襯宣傳
不過，偏偏運動員好容易受傷。自從去年八月劉翔喺幾億人眼前因傷退賽後，平保要搵佢就要趁治療嘅空檔時間。國壽嘅遭遇都差唔多，原本國壽（海外）慶祝25周年嘅一連串活動，想搵姚明嚟香港露吓面，但係佢最近都受咗傷，睇嚟排期都好難。
講番平保「一帳通」搵靚仔劉謙代言都幾抵讚，因為唔使點硬銷，就知「一帳通」同劉謙嘅魔術一樣咁魔幻神奇，真係一絕也！
余絲韻