本文重點
第一信用財務總行下周就會喬遷中環，依家住緊淺水灣嘅主席冼國林，返工放工慳番好多時間，不過佢都唔歎得幾耐，事關佢年底就會搬入西貢。咦？莫非冼國林有鋪過海癮，係都要過海返工放工先安樂？冇錯，佢真係鍾意海，不過唔係過海，而係出海！
謙稱「哎吔老闆」歎番吓
冼國林耍詠春犀利係人都知，原來佢仲有第二個興趣，就係玩遊艇。好多車主都當架車係老婆咁愛錫，冼國林為咗架四十幾呎長嘅愛艇亦付出咗好多，仲由淺水灣特登搬入香港後花園西貢，目的都係要多啲親近隻艇，多啲出海！
原來冼國林個遊艇牌都考咗一段時間，佢慨嘆話以前做細嘅，邊有時間追求呢啲人生興趣？不過依家話晒都係「哎吔老闆」，就可以追求啲自己想要嘅嘢。咁又係，人生到咗唔同階段，就有唔同嘅嘢追求，今日嘅冼國林搵夠錢，係時候多啲享受人生。
冼國林離開咗永亨財務，憑住肯搏夠膽識，創辦第一信用財務，搞到有聲有色，依家搬總行之餘，仲喺沙田、大埔搵地方租開分行，聽聞公司第四季仲會上市，又點會係「哎吔老闆」吖？
余絲韻