本文重點
阿里巴巴（01688）主席馬雲去年七月提出嘅「過冬論」，依家被公認為有先見之明，其實阿里對中國嘅出口預測亦相當精準，佢哋嘅統計資料因此成為國家評估貿易前景嘅其中一個參考數據！
測中出口負增長
阿里首席執行官衛哲近日接受英國媒體訪問時爆料話，去年七月副總理李克強到阿里總部視察時，阿里曾引用本身數據，指出中國去年第四季出口將有機會出現負增長，對如此悲觀嘅分析，就連李克強本人當時亦有所保留，但就係因為呢次嘅會面，阿里自此就應中央要求提交季度嘅統計資料，作為國家評估貿易前景嘅其中一項參考數據。
既然阿里能成功預警出口負增長，大家最感興趣嘅，當然係佢哋對往後外貿環境嘅睇法，衛哲話未來3至6個月對歐洲貿易相信仍現負增長，相反對美國就會呈非常緩慢嘅復甦，而新興市場嘅情況就最樂觀。呢個「阿里預言」會否又成為事實，大家拭目以待。
余絲韻