本文重點
內地國有金融機構搵阿爺注資、股改跟住上市嘅模式，實施咗咁多年，已成功炮製咗幾間大中資銀行成為股民嘅寵兒，大家跟住最留意嘅係光大銀行以及中國再保險呢兩間「後起之秀」。
中再保自身難保
呢兩間公司已先後獲中央匯金注資，下一步應該係引入更多新股東，以成立股份制公司。點知最近光銀嘅股改結果令圈中人大跌眼鏡，因為中再保亦躋身光銀第四大股東，有人狠批呢單股改直情係無厘頭。
中再保攞成三十三億人仔入股光銀，照計可派出董事去幫光銀執靚公司嘅業績及公司治理等，不過實情係中再保自己都顧唔掂，佢嘅人事權已由中國保監會轉交到匯金手上，近年公司高層好似走馬燈咁，幻變到公司員工一時間都唔記得老細係邊個。
中央匯金入股內地多間國有金融機構，十隻手指都數唔晒，佢有幾多人才可派駐出去，大家心中有數。啲錢來來去去都係阿爺嘅，塘水滾塘魚，風險又再次集中，唔知咁嘅股改有乜意思？
余絲韻