本文重點
每個地方都有啲表揚當地傑出外國人嘅獎項，好似上海市政府咁，啱啱就宣布會頒獎畀滙豐中國行長兼行政總裁翁富澤，表揚佢喺上海嘅貢獻，其實翁富澤早喺○七年已獲白玉蘭榮譽獎，今次拎埋榮譽市民獎即係「升呢」。
表揚金融教育貢獻
翁富澤得獎嘅官方原因，係佢為發展上海作為金融服務中心嘅貢獻，以及係本土銀行業培育人才及提供訓練，同時亦都對上海嘅教育以至社會服務作出貢獻。不過上海市長韓正近排至話銀行家貪婪，今次頒番個獎畀外資銀行家，唔知有無示好嘅關係呢？
翁富澤已經做咗上海市民5年，去上海之前佢就喺香港工作，出任亞太區貿易服務主管，其後北上發展，自葉迪奇轉投交行（03328）後，佢就出任滙豐喺中國嘅主理人。同好多滙豐人一樣，翁富澤去過好多唔同地方做嘢，除咗中國及香港外，仲去過美國及印尼工作。佢喺六七年於英國出生，已經服務咗滙豐20年。
余絲韻