本文重點
近期證監會執法工作有唔少成績，例如首次就收市競價時段作出行動，又對付不少大人物，好似凍結國美（00493）前主席黃光裕嘅資產等，行政總裁韋奕禮日前接受《亞洲華爾街日報》訪問時，亦不忘大讚法規執行部董事施衛民，話佢好似「鐵人」咁唔識疲倦（Tireless），得以令證監會執法工作發揮更大效力。
韋奕禮激讚施衛民
韋奕禮話，自從施衛民由澳洲來港上任後，證監會執法工作嘅方向更加進取及創新，佢亦有勇氣挑戰約定俗成嘅概念。聽落又係，證監會近年的確肯嘗試採用以往較少用嘅權力，好似凍結涉嫌違規人士嘅資產、以刑事檢控內幕交易等。
韋奕禮為過去一段日子，證監會挑戰唔少大人物感到驕傲，好似電盈（00008）拆票事件、凍結黃光裕資產、調查中信泰富（00267）以及檢控大摩前要員杜軍內幕交易等。佢又話外國人加入證監會有好處，因為佢哋可以從另類角度睇事物及有新思維。絲絲就話，佢哋可以同本地複雜嘅商業及政治環境保持一定距離，可能真係佢哋嘅優勢。
至於韋奕禮喺香港會做到幾時，會唔會做埋呢一屆任期就返英國？佢就話唔會作任何預測，只係想喺呢個工作崗位上做啲唔同嘅嘢。
余絲韻