港股昨日走勢反覆，午後內地股市回升下反彈，恒指升168點，報收20,306點。詩詩所持國美（00493）升7.3%，報收2.35元，好快返家鄉。至於濱海投資（08035）就差少少，報收0.495元，再跌4.8%。不過，詩詩又唔急於打靶，因為濱海有天津市政府作後盾，一定會注資，加上技術走勢不俗，陰陽燭圖出咗支長腳，要反彈話咁易。只要大市唔使死，股仔雖欠動力再上，但也不用睇得咁悲觀。
自內地落實啟動3G網絡後，無論係經營網絡的電訊股，又或者為電訊商服務的設備股，都希望在內地的流動電話市場尋找商機。中國無線（02369）早已表示今年將會加大3G產品研發上的開支，包括計劃開發3款TD-SCDMA（HSDPA）/GSM雙模智能手機、4款GSM/GSM雙模智能手機及四款CDMA1X2000（EVDO）/GSM雙模3G智能手機。
雖然去年中國無線的業績錄得虧損，不過隨着重組完成，加上受惠內地已推出對行業相關的振興措施，公司今年有望扭虧為盈。股價調整咗一個月，昨日見股價靠穩，值得留意。
詩詩