本文重點
金融海嘯下真係乜都平，唔單只係平價貨，就連貴價商品都一樣。內地胡潤研究院剛發表「2009富豪消費價格指數」，分析汽車、遊艇、手錶珠寶等59項與高品質生活方式有關商品服務價格走勢，話呢啲貴價商品價格今年中漲幅為4.6%，雖然仍有上升，但較○八年嘅12.6%升幅，足足低咗8個百分點，當中有啲商品價格仲係維持不變。
跑輸去年 通脹撐價
負責調查嘅胡潤話，因受到通脹影響，奢侈品價格仍緩慢上升，而喺各類貴價商品中，名牌酒價格升幅最顯著，平均漲幅達21%，或者係與個別酒類以價格作為品牌策略有關；中國人重視讀書亦有助教育費上升，EMBA學費就升咗9.5%，長江商學院嘅EMBA學費更增加三成。當然貴價商品價格亦唔係全部上升，如旅遊、房產類價格今年就雙雙下跌，兩者今年便分別下跌6.5%及1.8%。
講到內地千萬富豪嘅生活方式，胡潤調查發現旅遊係有錢人最青睞嘅休閒方式，平均假期日數係15日；游泳及高球就係最受富豪歡迎嘅運動；富豪重視子女教育，美國及英國是下一代教育最優先考慮嘅國家。
余絲韻