本文重點
中信1616（01883）尋日公布業績，喺金融海嘯下仍錄得盈利增長兼增加派息，都算難得，怪唔得一班管理層都幾好笑容，其中兩個相信係行政總裁阮紀堂及財務總裁陳天衛，皆因呢兩位講慣廣東話嘅大男人，尋日可以堂堂正正咁用廣東話去Present上半年嘅業績表現，自然流暢得多，絲絲聽落都覺得順耳啲。
石總在位命令講國語
點解咁講？事關集團前主席石萃鳴在位嘅時候，講明要一班管理層用國語去Present業績，喺公司開會時亦要講國語，搞到不擅國語嘅阮紀堂同陳天衛之前都要頂硬上。
不過石總早前已宣布退休歎世界，換上辛悅江掌舵，唔知辛總係咪放佢哋一馬，當辛總用國語Present完後，接力嘅阮紀堂就笑住咁話，依家可以「轉台」講番廣東話，絲絲的確感受到佢嘅瀟灑又返嚟喇。
其實諗番轉頭，絲絲覺得石萃鳴命令講國語都係為佢哋着想，等佢哋可以多啲練習，壯大個膽，依家淨係聽廣東話，反而無咗啲搞笑場面。
余絲韻