滙控升勢料持續

外圍氣勢如虹，A股周三大跌一日之後亦迅速收復失地，上證昨日重上3,400點關。股市一跌，人行仲驚過班散戶，即刻派定心丸，話會維持適度寬鬆貨幣政策，冇低位撈底之散戶大嘆走寶，又到唔識驚之地步。港股昨日中段創20,712點年內新高，收市升339點，報20,573點。

滙控（00005）出中期業績前夕受到追捧，單日抽升3.4元並以接近全日高位77.1元收市，此升幅好耐都未試過，基於今次大行預測分歧好大，亦有好多非特殊項目，散戶好難再睇PE決定抵唔抵買，但睇P/B仍係得1.4倍，在炒經濟復甦預期之下應仲有上升空間，加埋有發A股之憧憬，滙控可繼續成為升市火車頭。相反，中移（00941）已顯得「過氣」，市佔率及ARPU不斷下跌，兼且要減價爭3G客，逆市下跌並不為奇。

踏入八月，係大公司業績期，恒生銀行（00011）、渣打（02888）、長和系、港鐵（00066）及港交所（00388）陸續有來，對大市之影響不言而喻。但睇昨公布業績之恒隆系以及滙控提早祝捷來看，業績期將可帶動港股另一輪升勢。防守性強之恒隆集團（00010）和恒隆地產（00101）昨分別升上逾5%，大唐發電（00991）發盈喜升5.38%，連剛發完盈警之江銅（00358）及中遠（01919）都話咁快回升，可見市場樂觀氣氛之濃！

全年銷售可達標

駿威汽車（00203）昨升近5%收報3.85元，可再挑戰4元關口。今年上半年，中國汽車業受惠於低排量購置稅調整、汽車下鄉及以舊換新等種種優惠政策，汽車銷量迭創新高，駿威附屬廣汽本田的銷量亦傳捷報，六月售車34,394輛；一至六月共售163,364輛，同比增14.77%。

集團今年銷售目標33萬輛，當中上半年售13萬輛，上半年銷售勝於預期，全年目標或調整至36萬輛。下半年再有新車款推出，目標不難達到。六月銷售成績有很大增長，王牌車款第八代「雅閣」銷16,399輛，環比增長16.74%；中檔車「范鋒」銷11,878輛，首次突破萬輛。

戴峰修