本文重點
做發展商唔單止要識起樓，仲要識得保育，好似恒隆地產（00101）董事長陳啟宗（洋名Ronnie）繼贊助復修北京故宮乾隆個花園後，佢亦贊助收復康熙個花園，而集團新取得嘅無錫恒隆廣場項目，原來裏面都有幾個涉及明朝及清朝嘅文物要保護，所以日後落成後，佢哋會喺該項目中劃出一個角落展示呢啲文物，好讓年輕新一代喺逛街購物之餘都可以認識中國嘅文化。
恒隆每7年踏新階段
其實Ronnie做事向來認真係人都知，好似每年佢都好用心寫佢嘅主席報告，佢話今年用咗一個禮拜來寫，但就比去年短咗好多，去年共寫咗8,000個字（英文計），今年只寫咗4,000個字。
佢話今年嘅主席報告主要是分析近20年恒隆走過嘅路，唔知係咪咁啱得咁蹺，每個階段都係7年，好似九一至九七年，恒隆無其他發展商咁多土儲，真係做任何決定都唔可以錯，惟有乖乖哋等待機遇，好彩畀佢哋等到金融風暴，買咗君臨天下等幾幅靚地，賺咗過百億。
第二個7年係九七金融風暴後至○四年，恒隆踏入預備期及趕上期，終於到○四年國際投資者認識到恒隆的價值，公司亦步入「起飛」的時期。
由○四、○五年至二○一○、二○一一年，係由公司喺內地拓展到開始收成期，但未來仍有漫漫長路，時刻不可鬆懈。
余絲韻