港股經過一輪急升後，昨日見回吐，不過回吐幅度有限，尾市更接近收復所有失地，跌幅不足1點，可以話牛氣沖天。國美（00493）在成交額猛增至逾10億元下，勁升近兩成，唉……都係詩詩唔夠耐性，上星期忍唔住以1.96元沽出，昨日以約24,220元參與供股，將獲發36,000股供股新股，若新股出籠時，國美股價能守在2元之上，接近5萬元純利袋袋平安。現持有中電能（00735）繼續進行整固，一於再坐一會等食胡。
股仔繼續個別發展，第一視頻（00082）又創今年新高，睇嚟彩票股有概念，值得捧場。瑞信將於本月底為幾隻彩票股進行非交易主導路演，包括御泰中彩（00555）、亞博科技（08279）及雅高（08022），唔排除呢幾隻股份，係彩票股下一炒作目標。
上述三隻股份中，以御泰最似樣，主要係御泰最先轉型搞彩票，去年全年盈利大幅攀升96%至2.68億元。昨日走勢轉強，料新一輪升浪展開。里昂出過報告建議買入，目標價1.1元，買入持中線，可博股價翻一番，短線目標則先睇0.8元。
詩詩