Diageo料逆市增長

近日市傳中投嘅新搞作，係大手筆用2.21億英鎊（約28.19億港元）入股英國酒水公司Diageo，名列第九大股東。Diageo來頭唔小，旗下酒水飲品好出名，品牌包括健力士、Johnnie Walker威士忌同埋Smirnoff Vodka。Diageo話環球市場尤其係俄羅斯市場收縮得好勁，不過公司相信今年盈利仍可錄得4%至6%增長。

中投喺金融海嘯前入嘅貨都蝕好多，入貨時以為執到寶，點知大摩、黑石股價都插水，結果搞到中投喺國內受到唔少質疑，董事長樓繼偉都好大壓力。近期中投分別投資過加拿大嘅能源公司、加碼認購大摩新股、認購熱爆嘅本港新股金隅（02009）同埋入股中信資本。

神華澳洲買田務農

中投走去賣酒，而神華（01088）就走去務農。絲絲尋日見到外電報道，澳洲國庫部長Wayne Swan已經批准咗神華收購新南威爾士州西北部六處農業田產，咁即係話，神華可以喺獲得煤炭勘探權嘅區域展開畜牧業務。

余絲韻