大笨象（00005）下半場曾逼近72元，創供股後新高，報收71.85元，逆市升近2%。祖國移動（00941）卻無咁本事，股價跌2.5%，報收77.1元，80元水平過門不達。

高度關注資金流向

「高佬盛」唱好紅色三保，上調目標價，祖國野獸（02628）跟平保（02318）分別再升0.9%及1.8%，財險（02328）追落後，逆市升3.4%。騰訊（00700）極力維持紅底股身份，報收100.5元，跌5.6%。雖然祖國魚缸回吐，但本地魚缸的紅色分子沽壓唔算嚴重，內需股更因大摩唱好而逆市做好，金鷹商貿（03308）創新高，報收10元，升12.8%，新百貨（00825）亦升13.7%。

今次升市好明顯由資金帶動，至於基本因素，就算古勝分析，看官亦未必願聽，所以在下要提醒看官，高度關注資金流向，一旦有資金撤出，魚缸下跌速度或者快過「笨豬跳」。香江的錢莊體系結餘居高不下，唔排除金管局會發行更多外匯基金票據，以收緊流動性，有斷估專家估計，今個月金管局或發行價值高達400億港元的票據。截至上周五，香江銀行體系總結餘已增至1,882億港元。

補貼措施刺激需求

熱錢流入實令古勝又愛又恨，因為資金充裕，令魚缸愈升愈有，問題係資金一旦撤走，魚缸將會插水插到好恐怖。總之都係嗰句，炒股唔炒市，暫時大市未出現岔子，仍可以入場參與活躍股份的鑊鏟派對。

花旗魚缸呢一輪升浪，可以話由科技股帶動，佢哋除咗開出靚仔成績表外，亦紛紛調高今年銷售數字。較早前英特爾亞太區的銷售數據報喜，顯示區內電腦產品需求改善，對聯想（00992）來說是個好消息。而且，中央加大對電腦設備的開支，近期推出的「以舊換新」措施，電腦亦被納入補貼範圍之一。聯想首季收入中有45%來自內地，北大人挺內需的政策，聯想自然受惠。

「高佬盛」亦睇好聯想，指集團可於一○年度扭虧為盈，並納入「確信買入」名單內，相信可吸引一輪買盤。吹水報告預測，聯想一○及一一年度分別錄得1,890萬美元及2.63億美元純利，扭虧預期將為該股帶來刺激，目標3.8元。另方面，聯想將贊助明年上海世博會，有助提高知名度。公司截至三月底止，有淨現金11.8億美元，有助企業作購併發展。今年初聯想已作全球重組，令○九至一○年節省3億美元，並提升競爭力。去年第四季毛利率已由9.8%升至10.3%，符合市場預期。

古勝