滬港之爭成為近月金融圈最熱門話題之一，雖然上海市官員次次被問到呢個問題，都一定會擺低姿態，話根本同香港不在同一層次上，要向香港多多學習等，但本港金融圈精英頭腦亦十分清醒，完全無被呢類迷魂湯灌醉。近日有銀行界老友仲斬釘截鐵地同金占士講，話上海要做國際金融中心一定得。
點解講得如此肯定？老友話上海要做國際金融中心絕對不是叫口號咁簡單。前排佢去上海出席陸家嘴金融論壇，聽主管金融的副市長屠光紹的高見，一開口先細數上海十幾個缺點，包括稅收比較高、金融市場不夠開放、法規不夠完善等。所謂知己知彼，當地官員對自己缺點睇得這麼清楚，相信只要對症下藥，應該很快可改善問題。
倘行快兩步港勢危
講起香港比上海最大的優勝之處，一定係開放的金融市場體系。為保障內地金融安全，中央行每一步都好小心，人民幣自由兌換更加未知幾時先可做到。不過老友就話，其實一切改革都只在阿爺一念之間，只要上面識得變通，市場化步伐行快兩步，咁香港就勢危啦。
香港面對的競爭壓力愈來愈大，其實成日來往滬港兩地的金融圈中人都深有體會，香港財金官員絕對唔可以再掩耳盜鈴，當無事發生，否則不進則退，香港分分鐘做咗中國的紐約變成佛羅里達州。
金占士