本文重點
大企業參與慈善捐獻除咗着眼於善款數字外，如何令捐獻發揮最大效益亦同樣重要，例如長和系嘅公司就經常以「你捐一元我又捐一元」嘅配對籌款方式提高捐獻效益。呢種慈善合作更被發揚光大到海外，長實尋日將「長江澳洲毅進獎學金計劃」續約10年，藉此為澳洲及亞洲學生未來10年嘅學術交流活動，帶來合共近1億港元嘅資助。
夥澳政府資助近億
「長江澳洲毅進獎學金計劃」成立於○四年，係由長江集團與澳洲政府以等額配對方式，共同資助亞洲及澳洲兩地嘅學生進行學術交流，過去5年已分別有500名澳洲學生前往亞洲參與學術交流，約500名亞洲學生往澳洲進修。喺續約後長江與澳洲政府就會喺未來10年，為呢個獎學金分別提供750萬澳元資金，即兩者合計會向基金注資1,500萬澳元（約9,300萬港元），而計劃對亞洲及澳洲學術交流產生嘅帶動作用，更創造「一加一大於二」嘅多贏局面。
余絲韻