佢話英博對青啤虎視眈眈嘅眼神令佢心感不妙，不單止要抽煙定驚，仲經常眼光光諗天光，成個月都瞓唔到覺。作為有百年歷史嘅青啤，由民族感情角度嚟講，金總真係接受唔到青啤個名叫「英博青島啤酒」，佢惟有做好幾手準備，以防萬一英博想控股佢哋，都有啲對策。點不知後來商務部限制英博增持青啤股份，最終英博又將青啤差唔多兩成股權賣咗畀朝日啤酒。

金總由前鋒化身Keeper

金總見英博仲有約7%喺手，亦心知佢哋都打算出售，即刻介紹自己嘅舊同學兼老友──福建首富陳發樹畀英博，就係咁促成咗呢單刁，保住青啤控股權無落喺外人嘅手。佢仲話做咗青啤董事長7年，其實一直都有被人忽略嘅愁悶，但經過呢次股權變局之後，心態已徹底由前鋒變成守門員，由領頭羊變成牧羊犬，仲話要守住唔會咁輕易畀外資嘅波射入青啤龍門喎。

余絲韻