Brian話玩閃避球，唔好以為「閃」開個波唔使出局就得，仲要有策略諗吓究竟幾時接唔接住個波，因為如果接得到，就可以令對方一個隊員出局，自己多一個隊員入局，所以一「閃」一「接」都要進退有據。Brian咁識玩，唔怪得佢做埋新創建（00659）康體活動委員會負責人。

對於皇馬以「天價」羅致C朗，Brian笑言皇馬同AC米蘭一樣，好似國企咁，唔理蝕幾多，總之有阿爺頂住。

里昂學師3年展所長

佢大佬Adrian今年十一月小登科，Brian話佢做伴郎都應該順理成章。佢又話老竇鄭家純其實好仁慈，好有人情味，從來都唔鬧伙記，又唔會逼佢返公司幫手，佢話返嚟新創建做嘢都係自己選擇，因為佢喺里昂做基建分析員「學師」3年，想有機會學以致用。問到喺里昂時有無受過氣，佢就話要受過氣先得到人生經驗。

既然以前睇開基建股，絲絲當然把握機會問佢除咗新創建外，仲有乜好介紹，佢話合和實業（00054）及中信泰富（00267）都唔錯，尤其中信泰富舊年畀人沽到得幾蚊雞，公司揸嘅資產都唔止啦。雖然平日工作忙，但佢話每個周日都會同一家人去飲茶。

余絲韻