港股維持炒上落形態，不過市場氣氛未見高漲，一眾股仔靜咗一排後，個別開始再起動，未來幾日可多加留意。多日來被熱炒嘅新股昨日終於放軟手腳，資金仍在輪流炒。內地航空企業爭取加燃油附加費，有助增加收入，在爭取加費之同時，國際油價卻從70美元回落，油價回落，資金自然流入追捧一眾航空股，中國國航（00753）昨日表現最為標青。
國航○八年業績出現虧損，主要係受油價急升，令手上燃油對沖出現重大虧損所累，今年油價大幅下降，市場自然憧憬國航轉虧為盈，上周見摩根大通增持多698萬股，大戶見油價似要大跌，自然把握低位入貨，近日有基金盤護航，股價上望5元不難，如跌穿3.5元作止蝕。
古晨