近日古晨不斷提醒鑊鏟友要多加小心，啲三四線股仔似有散散哋味道，結果周二有部分股仔出現「異動」。炒股唔係炒命，保命最實際，如果個勢無咗，記住要減低注碼，發覺唔對路就清貨離場，話晒現時個市絕對唔算低位。
股仔危機四伏，要炒都搵番啲正路嘢炒，內地今年「保八」再成為話題，內地出口未見起色，令「保八」重任落在內需身上，內地持續放寬借貸，無非係想刺激居民消費意欲，香港以前經濟起飛，百貨業最受惠，茂業國際（00848）在深圳做百貨做得好成功，當中更有不少係自置物業，近期內地房地價狂升，茂業手上資產亦升值唔少，近期股價橫行似收集，不妨買少少博佢爆上2.2元，如果跌穿1.7元先行止蝕。
古晨