尋日期指結算，不過大市就呈悶局，成交金額更只有500億元。事實上，大家只要計一計數，由年頭至昨日為止，恒指已累升逾4,000點。以前就話跌市，基金點都要出來粉一粉飾吓個櫥窗啫，但年初至今，恒指、藍籌、二三線甚至細價股都升得有板有眼，相信大家都能夠執番些少錢，所以芬佬積極性都冇咁強。因此，縱使今日係○九年的半年結，相信變化都唔會太大，勸喻大家勿過分憧憬。
講番市場消息，尋日有消息指，發改委預計，在國家一系列振興汽車行業的政策下，今年上半年汽車產銷量約600萬輛，而為了輔助汽車行業未來兩三年有更好的發展，故料今年所頒布的多項支持汽車產業政策將延續至明年，對汽車股來說，不失為一個好消息，話唔定又會惹來一番新憧憬添。
另外，市場上經已開始聽到話樓市過熱的聲音，部分更認為，今時今日樓股皆升，而大量資金又在金融體系內循環，最終或會造成新的資產價格泡沫呢，所以股友們要留意啦。
（小尾）