本文重點
早幾日內地私募基金界嘅大紅人趙丹陽終於一償心願，與美國「股神」巴菲特共進午餐，佢唔單只向股神請教投資之道，仲把握機會，向股神推薦自己一早持有嘅物美（08277）。股神效應果然強勁，呢個消息已經令物美股價連升4日，漲幅超過兩成，趙丹陽帳面賺過億港元，「天價」午餐立即變咗「超值」午餐，真係抵！
飯局薦股 物美即飆
每年嘅股神慈善午宴一向被外界留意，自○五年開始，每年拍賣價有升無跌，趙丹陽舊年就以211萬美元獲得呢次機會，創咗歷史新高價。
據內地傳媒報道，佢一向係股神嘅忠實「粉絲」，一直堅信巴菲特嘅價值投資理念，仲喺○二年成立「赤子之心」中國成長投資基金，係內地最早運用信託模式管理私募基金嘅人。
聰明錢借消息炒起物美，趙丹陽係物美H股第二大流動股股東，揸住接近6,600萬股，家陣股價已升破10蚊嘅兩年半新高。
余絲韻