本文重點
由來港上市到引入美國餐飲業巨人成為股東，小肥羊（00968）已經成為內地最具代表地位嘅餐飲品牌之一。不過喺海峽對岸嘅台灣，「小肥羊」嘅經營權誰屬就出現爭議，經營小肥羊嘅台商強調自己依法從大陸取得商標使用權，但訪台嘅小肥羊管理層卻認為「台版小肥羊就是山寨版」，雙方更似乎要對簿公堂！
台版經營權起爭議
台版小肥羊經營權爭議，是否涉及本港上市嘅小肥羊，絲絲一時都未能搞得清楚，但據台灣媒體報道，訪台嘅小肥羊執董張占海話，小肥羊喺台灣嘅特許經營權早前已被收回，公司並將採取法律行動維護權益。
不過「台版小肥羊」嘅總經理黃慶宇就發出聲明，指自己喺3年前以個人身份，取得小肥羊喺台灣嘅5年商標使用權，再透過合營公司汛浩喺台灣經營小肥羊蒙古火鍋餐廳，及後汛浩雖然宣告拆夥，但佢就繼續以其所獲嘅商標使用權經營「台版小肥羊」。
黃慶宇更強調，佢已計劃對張占海所作嘅「個人言論」採取法律行動！
余絲韻