本文重點
唔少人都鍾意打高爾夫球，貪佢唔使點跑但又有足夠嘅運動量，聯想集團（00992）董事長柳傳志原來都係其中一個，柳總仲透露最近打波時試過一桿入洞，不過謙虛嘅佢話自己都只係好彩，一桿入洞係好偶然嘅事，因為佢話自己打波嘅技術其實只係好一般，仲話嗰個洞其實好近添。
罕有指出楊總缺點
起初絲絲以為個洞真係好近，點知講講下，柳總竟然話個洞有一百三十碼咁遠，佢話如果二百碼就肯定入唔到咁話，柳總確實太謙喇。絲絲唔識打高球，但老友記話，一百三十碼一桿入洞好似要請食飯，亦有話一桿入洞嘅話會旺三年，總之就唔係咁易做到。最後有無請食飯柳總就無講到，但佢就希望係一個好兆頭。
訪問中，柳總又再被問到點睇轉任首席執行官嘅楊元慶之表現，今次佢老人家罕有地提到楊總喺聯想收購ＩＢＭ時確暴露咗些少缺點，而急躁就係其中一項，不過柳總始終都以「很出色」去形容楊總嘅表現。打高球亦切忌急躁，唔知柳總有冇帶楊總打波，學習如何避免急躁呢？
余絲韻