留學被寸中國無電腦

李彥宏接受內地傳媒訪問時，就爆出喺23歲時畀人羞辱。佢話當年考得獎學金到美國修讀電腦系，有次參加一個研究小組時，面試嘅教授問佢：「你係中國嚟嘅？中國有電腦咩？」李彥宏覺得中國作為一個咁大嘅國家，而且當時為九十年代，又點會冇電腦呢？呢番話擺明係對祖國嘅羞辱。

就係呢番話令到李彥宏下定決心，立志要喺互聯網行業闖出名堂，九九年返大陸創業。故事結局大家都知，百度最終成為咗「中國Google」，○五年喺美國掛牌，首日股價勁升三倍幾。

百度招股堅持「不打折」

其實呢個故事仲有段小插曲，話說百度當日喺美國搞招股嘅時候，投行指百度來自中國，而中國喺美國畀人嘅印象就係落後，所以股價要打折先可以吸引到投資者。李彥宏當然唔就範，一句「中國不打折」成為當時各大媒體嘅頭條，而百度首日上市嘅表現亦證明，李彥宏拒絕投行壓價係正確嘅。

余絲韻