港股昨日期指結算，而今日則為半年結，大戶經過三個月來不停掃貨做上，難得頂到半年結，無理由唔乘勢做靚埋盤數，話晒上半年基金唔易做，盤數靚啲都容易向基金持有人交代嘛。雖然大市跌唔得去邊，但市場愈炒愈靜，無咩資金願意高位追貨。古晨覺得點都好，炒股唔炒市，如果個別股票有消息，有炒味自然就有炒家，有勢就唔怕高追。
講番股票，由於最近新股上市後表現甚佳，加上市場無嘢炒，令唔少資金轉戰炒半新股，貪佢哋夠新，沽壓唔大，早前上市的旭光（00067），主要從事芒硝嘅開採及加工，上市後一度炒過如癡如醉，上周跟隨一眾資源股回吐，但似震倉收集，近兩日資源股見底回升，旭光炒味再現，在半新股的效應下，資金埋位再炒，應可看高一線，上次高位見過2.59元，估計今次可望炒穿頂，暫睇2.8元，止蝕位就定於2.15元。
古晨