祖國魚缸回勇，但本地魚缸跟唔上，恒指低開後，曾倒升87點，盤中高見18,687點，中段逐步回落，在東瀛魚缸跌逾百點影響下，恒指曾低見18,451點，散場報收18,528點，跌71點。國企指數報收10,987點，跌49點，同樣係悶局一場。現貨場成交縮水至只有500億元，明日本地魚缸假期，呢個星期五花旗魚缸亦因為獨立日假期休戰，相信本周各地魚缸表現呆滯，唔會有太大上落。

藍色大隻佬乏善可陳，只有中信泰富（00267）升6.6%表現較突出，皆因「高佬盛」將其納入亞太區「確信買入」名單，刺激其股價逆市做好。重量級大笨象（00005）跟祖國移動（00941）均見下跌，但跌勢溫和，同樣跌0.3%。「高佬盛」呢排係大好友，唔單止唱好中信泰富，亦重申聯想（00992）的確信買入評級，聯想盤中高見3.08元，升4.4%，散場報收3.03元，升2.7%。

騰訊好快變紅底股

黃金價格下跌，金礦股全部仆直，跌幅由1%至3%不等，其他資源股亦唔精神，中鋁（02600）、江銅（00358）及鞍鋼（00347）等，全部跌逾2%。紅色錢莊股曾逆市做好，無奈高位未見承接，午後隨魚缸回軟，只有中行（03988）仍保持升幅。

本地地主亦要抖氣，雖然本地屋仔市場近日銷情不俗，但本地地主累積升幅唔嘢小，三兄弟檔口（00016）昨日一度再重現紅底股身份，可惜又係曇花一現。家陣除咗金錢龜（00011）同港交所（00388），大隻佬已無紅底股，三兄弟檔口若能回復此身份當然係好事，古勝估計下一個最有機會變身紅底股係騰訊（00700）。昨日騰訊逆市升1.6%，股價報收94.55元，百元大關只有一步之距。

361度登場有睇頭

嚟緊陸續有新丁登陸本地魚缸，以逾400倍爆燈指數的霸王（01338）將於周五登場，今日有361度（01361）先亮相。近日登場新丁皆有老利表現，得缸邊友熱捧的361度，或成為今日魚缸焦點。昨日旭光（00067）跟中金屬（00773）又再落鑊，前者升逾5%，後者更錄得超過一成進帳。近日二三線股仔熱潮減退，今日361度料甚得鑊鏟友歡心。

本地魚缸經過第二季的大幅跳升後，升勢能否延續至第三季，古勝烏卜卜，但近日上升動力已明顯減弱，在下認為都係要保守番些少，要揀較穩陣的股份。或者係呢個原因，一向屬於穩陣派的粵海投資（00270）昨日逆市升6.6%，成交亦有所增加，配合升勢。粵海投資去年供水業務獲7.3億元水費補貼，但被發電及物業投資等業務減值虧損6.83億元接近全數抵銷，全年純利只增長10.6%至18.76億元，每股盈利30.54仙，營業額升13%至75.9億元。

供水收入維持穩定

粵投的供水業務一向穩定，早前廣東省及香江政府已簽訂三年供水協議，粵投估計未來三年供水收入分別為29.59億元、31.46億元及33.44億元。反而其電廠業務方面今年或較有睇頭，因為煤價從高位回落，粵投有信心發電業務今年可扭虧為盈。

講到粵投較吸引的地方，應該係旗下待分拆的酒店業務，雖然目前業務經營情況一般，但等待時機成熟分拆上市，將對粵投帶來一定刺激。

古勝