本文重點
有「上海和黃」之稱嘅復星國際（00656）尋日開股東會，董事長郭廣昌照例同傳媒傾番兩句。叫得「上海和黃」，即係話復星旗下有好多瓣業務，記者自然又會每個範疇都追問一番，點知郭廣昌答答吓問題，忽然將個波拋畀總裁汪群斌，原因係汪總靚仔啲！
靚仔要答多啲問題
其實郭董、汪總同埋復星副董事長梁信軍，連同復星旗下復地（02337）總裁范偉都係上海復旦大學嘅校友，佢哋一齊創業嘅故事相信唔少人都聽過。郭董作為創業「牽頭人」，順理成章做埋集團「大佬」，其他幾位校友就各司其職，生意愈做愈大，反映佢哋合作無間。點知原來郭董連答問題都分工咁「仔細」，話汪總比起佢本人同梁信軍「樣子更帥」，所以應該答多啲問題。汪總聞言有啲尷尬，而同樣坐喺台上面嘅梁信軍會唔會唔同意郭董嘅講法呢？
有女記者話如果講靚仔，尋日冇現身嘅范偉應該係佢哋最靚仔嗰個，唔知郭董點睇？
余絲韻