佢又指吓隔籬幾位華潤置地（01109）嘅中高層，叫絲絲問吓佢哋係咪可以成日見到屋企人，點知隔籬幾位都頭擰擰。宋總話喺得華潤度做嘅人，好多都係內地派嚟香港，嚟到香港後又派返去內地，華潤咁大個集團，三十幾萬員工分布天南地北，又要成日出Trip，邊有可能成日都見到屋企人。

宋林：好耐無見個女

佢仲話連自己都唔例外，個女家陣喺美國讀緊大學，老婆走咗去陪讀，自己都好耐無見過個女。不過絲絲覺得奇怪，雖然係咁，但好多華潤系嘅中高層，包括佢身旁幾位都係一做就十幾廿年，點解呢？宋總話因為華潤提供咗好多機會同舞台畀人一展所長，嗰種成就感唔係一般公司可以畀到，所以宋總呢排亦陸續辭咗上市公司主席銜頭，畀啲機會新人上位。絲絲相信仲有樣吸引之處，就係薪金待遇優厚囉，佢哋喺舊年金融海嘯，仲按公司業績表現又加薪又有花紅，邊間公司夠佢哋嚟呀！

余絲韻