小股東鬧場一肚火

話說林百里與台灣有拍賣女王稱譽嘅睿芙奧藝術集團執行長郭倩如傳出婚訊，尋日有股東就對林董話，有啲人有緋聞，公司股價會有反應，而林董朋友多啲，亦即係「身體夠好」，廣達嘅股價話唔埋會由50蚊（新台幣‧下同）升到100蚊，所以佢哋「支持林董多識女朋友」。

咁識講笑嘅股東又話，林董家陣同郭小姐過從甚密，係咪可以講畀大家聽呢？其實小股東唔多滿意公司嘅股價，所以就趁機鬧場。林百里聽到一肚火，同小股東唇槍舌劍一番，最後小股東竟然連緋聞都攞嚟講，所以佢就話「有關個人嘅問題一概唔答。」

林百里個朵無郭台銘咁響，但佢啲威水史亦係一籮籮。查實佢係香港人，喺調景嶺長大，後來去咗台灣讀書，仲創辦咗家陣係全球最大筆記電腦生產商嘅廣達。林董廿幾年嚟收購咗好多張大千、溥心畬等名家作品，次次拍賣都好轟動添。

余絲韻