尋日提過有位叫馮孝忠嘅銀行家「小登科」，到底呢位馮孝忠係唔係大家諗嗰位？絲絲本着求真嘅堅毅精神，打咗電話去同恒生銀行（00011）總經理馮孝忠講「恭喜」，結果馮孝忠嘅回應係「多謝！多謝！」
馮孝忠結婚嘅消息喺金融圈都好哄動，佢喺行內資歷深、人面廣，絲絲可以想像，佢尋日一定接電話接到手軟。為人向來低調嘅馮孝忠，面對婚姻人生大事都離唔開呢種作風，絲絲好八卦想知佢會唔會擺酒大宴親朋，會唔會……總之所有絲絲想知嘅嘢，佢都係謙恭回應：「我同另一半都係想盡量低調。」低調還低調，搵到同自己共諧連理嘅伴侶係一件開心事，從馮孝忠嘅語調，絲絲絕對意會到喺電話另一端嘅佢，難掩心中喜悅。
就快同馮孝忠拉埋天窗嘅呢位內地葉姓女記者，到底係點樣認識馮孝忠？兩者又係點樣一見傾情？雖然不得而知，但馮孝忠喺銀行界打滾多年，知識及見識甚豐，佢看上嘅女子相信絕非泛泛之輩，絲絲都好想見識吓。
余絲韻