本文重點
鍾意玩智能手機嘅人都知道台灣品牌HTC（宏達電子），佢哋近年強勢挑戰蘋果iPhone，仲愈戰愈勇。宏達嘅老闆正正係台灣女首富王雪紅，即係已故「經營之神」王永慶個女。
宏達嘅發展一日千里，股價曾經去到1,220蚊（新台幣‧下同），即係約300蚊港紙，就算依家得番400幾蚊，但公司前景仍一片光明，仲好受投資者追捧。相比之下，王雪紅同老公陳文琦創立嘅威盛電子，境況就好慘喇！
道歉十幾次始通過
威盛係一間IC設計公司，幾年前豪情挑戰英特爾，曾經係威係勢，股價亦試過創下629蚊高峰，一度榮膺台股「股王」。不過後來江河日下，公司連蝕幾年，股價依家得番12蚊。
尋日威盛舉行股東會尋求減資（註銷股本，再搵投資者增資）六成，股東梗係嘈到天花板都冧咁滯啦！總經理陳文琦認衰，又前前後後道歉十幾次，先至令股東最終通過晒啲議案。有小股東語重心長話，希望佢哋攞出王永慶嘅精神，好好咁經營間公司。
余絲韻