本文重點
「鑊鏟派對」最近由魚缸開到去樓市，新盤銷情理想之餘，二手成交亦表現不俗，幾個主要屋苑平均呎價都一支箭咁向上飆升。市場氣氛如此活躍，其實都要多得銀行唔少，事關大家嘅按揭爭霸戰打到火紅火綠，將以客為尊的精神發揮到淋漓盡致，按息唔滿意可以一減再減，當然刺激大家入市意欲高漲啦。
銀行按息一減再減
金占士有個老友最近終於成為「蝸牛族人」，聽佢講起由立志租一世屋，到向太太屈服而買樓的心路歷程，原本都有幾分怨氣，不過佢最近再講起新居，態度卻出現咗極大轉變，最大原因就在於銀行竟然將樓按息率減完再減，計落條數，令佢逃脫咗因為買樓要加家用的命運。
老友話，自己的「新居」其實一點也不新，原以為三十多年樓齡，銀行一定唔會太鬆手，殊不知由簽臨時合約至今不過短短一個多月，態度最為積極的獅子銀行仲講到明，如果其他銀行有更優惠條件，絕對可以跟到足。
資金大量湧入令本港銀行水浸，金占士相信按揭戰白熱化的情況將會持續一段時間，樓市「鑊鏟派對」都應該會有排開。
金占士