本文重點
香港已經有幾隻內地運動品牌公司上咗市，比較多人識嘅係李寧（02331），而喺大陸已經打響名堂嘅361度，都會嚟香港上市，為咗提高在港嘅知名度，佢哋搞咗個舊鞋換新鞋活動，送出361對波鞋，仲請當紅嘅偶像Angelababy同古巨基設計巨型波鞋，擔任活動嘉賓。
舊換新送361對波鞋
呢個計劃係只要捐出一對波鞋，就可以換取一對361度品牌嘅波鞋，為咗令人深深記住呢個牌子，今次限量送出361對波鞋。絲絲聽朋友講，呢間公司主要客仔係14至23歲嘅中學生及大學生，為咗吸引佢哋嘅注意，所以宣傳手法要好特別，曾經喺最多年輕人玩嘅QQ度賣廣告，又開咗個361度運動社區，每年仲花費百幾萬元作網絡宣傳，今次更請咗兩個偶像明星坐鎮。
絲絲翻查公司資料，知道原來佢哋來自福建晉江，即係安踏（02020）嘅同鄉，361度嘅老細用2,000多元起家，同安踏老細背景相似，店舖集中喺二線城市，以賣運動鞋為主，佢哋視安踏為競爭對手。
余絲韻