本文重點
倫敦金融城市長陸毅安近日四圍去推廣，去完大陸之後，依家落腳香港，最熱門話題莫過於喺香港同埋倫敦都係招牌企業嘅滙控（00005），會否抵擋唔住上海嘅誘惑，喺上海上埋市，市長雖然無講，但佢話一啲都唔出奇，因為滙控喺內地嘅業務都已經有一段日子。
要記者退後先發言
香港同倫敦都係國際金融中心，兩地最大嘅分別就梗係香港逼好多，所以好多外國人嚟到香港，都會因為環境逼而唔係好習慣。陸毅安尋日就領教過，佢同香港傳媒見面時，都因為環境細而有啲忟憎！要三催四請圍住佢嘅攝影記者退到最後排，先肯開始同記者交流。
佢尋日已經喺五星級酒店同傳媒交流心得，但間會客房豆腐膶咁細，佢嘅人氣又吸引咗三、四十個記者同攝影師，搞到逼上加逼。攝影記者當然個個都想親近市長，近距離捕捉佢嘅神態，但唔知係閃光燈太閃，定係佢唔慣畀咁大支鏡頭對到正，佢要等班攝記排到最後先肯開始講。
除咗滙控之外，大家最感興趣當然係睇吓中投係咪會去倫敦設辦事處，進度點樣，市長雖然唔肯講傾成點，但佢話英國屬於完全開放嘅經濟體系，好歡迎其他機構喺嗰度管理資產。
余絲韻